रङ्गमञ्चमा डेब्यु गर्दै बेनिशा, ‘तारा’ बन्न सिनेमाबाट दुई महिनाको विश्राम

काठमाडौं । अभिनेत्री बेनिशा हमाल अब भिन्न स्वरूपमा दर्शकमाझ आउने भएकी छिन् । पर्दामा आफ्नो अभिनय क्षमता प्रमाणित गरिसकेकी बेनिशाले अब रङ्गमञ्चमा पाइला टेक्न लागेकी हुन् । यसै सिलसिलामा उनले आगामी दुई महिनाका लागि चलचित्रका सबै कामबाट विश्राम लिने घोषणा गरेकी छिन् ।

मदन पुरस्कार प्राप्त चर्चित लेखक अमर न्यौपानेको उपन्यास ‘सेतो धरती’ मा आधारित नाटक मञ्चन हुने तयारीमा छ । यसै नाटकमार्फत बेनिशाले थिएटरमा आफ्नो डेब्यु गर्न लागेकी हुन् ।

उपन्यासको केन्द्रीय पात्र ‘तारा’ को चुनौतीपूर्ण र सशक्त भूमिकालाई जीवन्त बनाउन उनले दुई महिनाको समय पूर्ण रूपमा नाटकलाई दिने निर्णय गरेकी हुन् ।

यो बीचमा उनले कुनै पनि नयाँ चलचित्रको छायांकनमा नजोडिने र केवल नाटकको तयारीमा केन्द्रित हुने बताएकी छिन् ।