बाबुआमालाई सहर लैजाने सपना अधुरै, बच्चाले देख्न पाउँदैनन् बुवाको अनुहार

0 Shares

काठमाडौं । वैदेशिक रोजगारीका क्रममा साउदी अरबमा तीन वर्ष बिताएर गत वैशाखमा झापा आएका पाँचथरको हिलिहाङ गाउँपालिका २ अमरपुरका कमल भण्डारी बाबुआमा भेट्न गाउँ पुगेकै थिएन । श्रीमती सीता र पाँच वर्षका छोरा झापामा रहेकाले उनी झापामै बसेर विर्तामोड नगरपालिका १० बिराटपोखरमा घर बनाइरहेका थिए ।

गत भदौ तेश्रो साता मोबाइलमा कुराकानी हुँदा कमलले बुबा गणेश प्रसादलाई दसैँसम्ममा घरको भुईं तलाको काम सक्ने बताएका थिए । ‘दसैँमा यहाँको घर सिङ्गार्न आइपुग्छु भन्थ्यो,’ गणेशले भने, ‘तर भदौ २५ गते कान्छो छोराले दाजुलाई गोली लाग्यो भनेर सुनायो ।’ गणेशलाई देशका मुख्य शहरमा जेनजीको आन्दोलन भइरहेको र आन्दोलनमा आफ्नो छोरोसमेत सहभागी भएको थाहा नै थिएन ।

घर निर्माण गरिरहेका कमल ‘जेनजी’ आन्दोलन चर्किएको समयमा भदौ २४ गते साँझ आन्दोलनमा सहभागी हुन झापाको विर्तामोड पुगेका थिए । कमलका भाइ पवनका अनुसार श्रीमती सीतालाई ‘धेरै समय बस्दिन । एकैछिन आन्दोलनमा गएर आउँछु’ भनेर कमल गाउँका अन्य साथीसँग विर्तामोड हिँडेका थिए ।

रात पर्दै गए पनि कमलको फोन उठेन । श्रीमती, बहिनीलगायतले रातैभरी मोबाइलमा फोन गरे । फोन लाग्ने तर कुनै प्रतिक्रिया नआउँदा सबैको मनमा आशंका पसिसकेको थियो । बहिनी मायाका अनुसार गत भदौ २५ गते बहिान १० बजे कमलको फोन बिएण्डसी अस्पतालका सुरक्षाकर्मीले उठाए ।

सुरक्षागार्डले ‘तपाईंको बिरामी यहाँ हुनुहुन्छ, आएर लिएर जानु’ भने । ‘हामीलाई केही थाहा नै भएन, हाम्रो दाइ घाइते भएर अस्पतालमा हुनुहुन्छ भनेर, हामीलाई कसैले जानकारी पनि गराएनन्,’ मायाले भनिन्, ‘दाजुसँगै आन्दोलनमा आएका अरु कसैले पनि हामीलाई जानकारी गराएनन्, हामीले त चिन्ने कुरै भएन, त्यो समूहमा गएकामा दाजुलाई मात्रै गोली लागेछ ।’

जेनजी आन्दोलन उत्कर्षमा पुगेका बेला भदौ २४ गते साँझको खाना खाएर कमल आन्दोलनमा सहभागी हुन विर्तामोड पुगेका थिए । आन्दोलनका क्रममा इलाका प्रहरी कार्यालय विर्तामोड छेउमा भएको झडपमा कमलको कन्चटमा गोली लागेको थियो । घाइते कमललाई सुरक्षाकर्मी र आन्दोलनकारीले उद्धार गरेर बिएण्डसी अस्पताल लगेका थिए ।

कमलका परिवारजनले भोलिपल्ट मात्रै उनी ‘भेण्टिलेटर’मा भएको जानकारी पाए । ‘दाजु कस्तो अवस्थामा हुनुहुन्थ्यो भनेर हामीलाई हेर्न नै दिइएन, भाउजू बेहोस् अवस्थामा हुनुहुन्थ्यो,’ बहिनी मायाले भनिन्, ‘चिकित्सकले गोली निकाल्न सकेनौँ, आफन्त पनि आउनुभएन भन्नु भयो, हामीले थाहा नै पाएनौँ भोलिपल्टसम्म, तर त्यतिञ्जेलसम्म धेरै ढिलो भइसकेको रहेछ ।’

कमलको शवलाई भदौ २८ गते अमरपुर ल्याई दाहसंस्कार गरेपश्चात काका शान्तिराम भण्डारी र श्रीमती सीता काजक्रियामा बसेका छन् । ५७ वर्षका बाबु गणेश आफैँ बिरामले थला परेका छन् । बिरामी आमा खगमायाले राम्रोसँग कान सुन्न सक्दिनन् ।

गर्भवती श्रीमती अझैँसम्म ‘अर्धचेत’ छिन् । सिकुवामा ‘हार्दिक श्रद्धाञ्जलि’ लेखेर ३० वर्षका छोराको तस्बिर राखिएको छ । आफन्त र छरछिमेकी घरभरि छन् । तर, गणेशलाई न निन्द्रा लागेको छ न भोकप्यास ।

झापामा घर निर्माण सकेर बाबुआमालाई पनि लैजाने कुरा कमलले परिवारसँग गर्दै आएका थिए । परिवारको मियो नै ढलेपछि न झापाको घर निर्माण सम्पन्न भयो न त बाबुआमालाई झापा लैजाने कुरा नै । ‘हामीलाई पनि घर बनाइ सकेर झापा लैजाने भन्दै थियो, तर खोइ आज के आइलाग्यो?,’ गणेशले भने । भुँइ तला ढलान सकिएको घर फिनिसिङ गर्न बाँकी छ ।

कमलका पाँच वर्षका छोराले अब कहिले बाबु भेट्ने छैनन् । गर्भमा रहेको सन्तानले बाबु देख्न पनि पाउने छैन । अर्धचेत श्रीमती सीताले सहयात्राको सात वर्षमै श्रीमान् गुमाउनु परेको छ । “यिनीहरुको भविश्य के होला भन्ने हामीलाई ठूलो चिन्ता छ”, काका शान्तिरामले भने ।

सहिद परिवारलाई भेट्न जनप्रतिनिधि, राजनीतिक दलका नेता र आन्दोलनका अगुवा आइपुगेका छैनन् । ‘हामीलाई भेट्न वडाध्यक्षसमेत आउनु भएको छैन्,’ सहिद कमलकी बहिनी मायाले भनिन्, ‘देशमा परिवर्तन होला भनेर आन्दोलनमा गएको दाइ वित्दा कसैले वास्ता पनि गर्नु भएन ।’

सम्बन्धित समाचार