रोमानियामा रेल दुर्घटनामा दुई नेपालीको मृत्यु

काठमाडौं । पूर्वी रोमानियाको बाकाउ सहरमा भएको रेल दुर्घटनामा दुई नेपाली नागरिकको दुःखद मृत्यु भएको छ। स्थानीय समयअनुसार आइतबार बिहान करिब ३ः२१ बजे बाकाउस्थित चिमी सडक खण्ड नजिक रेलको ठक्करबाट उनीहरूको घटनास्थलमै ज्यान गएको हो।

रोमानियाको बाकाउ आपत्कालीन सेवा निर्देशनालय (आईएसयू) का अनुसार दुर्घटनाको सूचना प्राप्त हुनासाथ उद्धारका लागि दमकल, एम्बुलेन्स तथा सघन उपचार (मोबाइल आईसीयू) सेवासहितको उद्धार टोली तत्काल घटनास्थलमा परिचालन गरिएको थियो। तर उद्धारकर्मीहरू घटनास्थलमा पुग्दा दुवै नेपाली नागरिकको मृत्यु भइसकेको चिकित्सक टोलीले पुष्टि गरेको थियो।

आईएसयू बाकाउले जारी गरेको विज्ञप्तिमा रेलको ठक्करबाट दुई जना व्यक्ति गम्भीर घाइते भएको सूचनापछि उद्धार टोली परिचालन गरिएको उल्लेख गर्दै घटनास्थलमै उनीहरूलाई मृत घोषणा गरिएको जनाएको छ।

प्रारम्भिक अनुसन्धानबाट मृतक दुवै जना नेपाली नागरिक रहेको पुष्टि भए पनि उनीहरूको नाम, उमेर, नेपालस्थित स्थायी ठेगाना तथा रोमानियामा बसोबास वा रोजगारीसम्बन्धी विवरण भने सार्वजनिक गरिएको छैन। सम्बन्धित निकायले मृतकको पहिचान खुलाउने तथा आफन्तसँग सम्पर्क स्थापित गर्ने प्रक्रिया अघि बढाइरहेको जनाइएको छ।

दुर्घटना कसरी भयो, ती नेपाली नागरिक रेलमार्गमा किन र कसरी पुगे तथा घटनाको वास्तविक कारण के थियो भन्ने विषयमा स्थानीय प्रहरी र रोमानियाली रेलवे अधिकारीहरूले संयुक्त रूपमा अनुसन्धान सुरु गरेका छन्। घटनास्थलबाट आवश्यक प्रमाण संकलन गरी दुर्घटनाको कारण पत्ता लगाउने प्रयास भइरहेको अधिकारीहरूले बताएका छन्।

यस घटनापछि रोमानियामा रहेका नेपाली समुदायमा शोकको वातावरण छ। नेपाली दूतावास तथा सम्बन्धित कूटनीतिक निकायले पनि घटनाबारे जानकारी संकलन गरिरहेको र आवश्यक समन्वय तथा कानुनी प्रक्रिया अघि बढाइरहेको जनाइएको छ।

दुर्घटनाको विस्तृत अनुसन्धान प्रतिवेदन सार्वजनिक भएपछि घटनाको वास्तविक कारण र मृतकहरूको थप विवरण खुल्ने अपेक्षा गरिएको छ।