१० महिनामा १६ हजारभन्दा बढी इभी गाडी भित्रिए, बाहिरियो २१ अर्ब रुपैयाँ

काठमाडौँ । चालू आर्थिक वर्ष २०८२/८३ को पछिल्लो १० महिनाको अवधिमा नेपालमा १६ हजार ३९२ थान विद्युतीय सवारी साधन (इभी) आयात भएका छन् । भन्सार विभागले सार्वजनिक गरेको चालू आवको साउनदेखि वैशाख मसान्तसम्मको वैदेशिक व्यापार तथ्याङ्कले यस्तो देखाएको हो ।

मुख्य गरी चीन र भारतबाट आयात भएका यी विद्युतीय सवारी खरिदका लागि मात्रै नेपालबाट २१ अर्ब २२ करोड रुपैयाँ विदेशिएको विभागले जनाएको छ । अर्कोतर्फ, आयात गरिएका विद्युतीय कार, जिप र भ्यानहरूबाट सरकारले १२ अर्ब ७३ करोड रुपैयाँ राजस्व समेत सङ्कलन गरेको छ ।

क्षमताअनुसार इभी आयातको अवस्था:-

भन्सार विभागको तथ्याङ्कअनुसार यस अवधिमा विभिन्न क्षमताका विद्युतीय सवारी साधनहरू आयात भएका छन्:

तीन पाङ्ग्रे इभी: ७ हजार ७८५ थान

५० किलोवाटसम्म (एसेम्बल हुन बाँकी): २ थान

५० किलोवाटसम्मका कार, जिप र भ्यान: २ हजार ८४८ थान (लागत: ५ अर्ब रुपैयाँ)

५१ देखि १०० किलोवाटसम्मका कार, जिप र भ्यान: ५ हजार २५ थान (लागत: १३ अर्ब २ करोड रुपैयाँ)

१०१ देखि २०० किलोवाटसम्मका कार, जिप र भ्यान: ७२३ थान (लागत: २ अर्ब २३ करोड रुपैयाँ)

२०१ किलोवाटभन्दा माथिका गाडी: ९ थान

तथ्याङ्कअनुसार बजारमा सबैभन्दा बढी ५१ देखि १०० किलोवाट क्षमताका इलेक्ट्रिक कार, जिप र भ्यान आयात भएका छन्, जसमा सबैभन्दा ठुलो रकम खर्च भएको देखिन्छ ।