0
Shares
काठमाडौं । नेपालको निर्जीवन बीमा क्षेत्रमा स्थापित तथा पुराना कम्पनीमध्ये एक नेपाल इन्स्योरेन्स कम्पनी लिमिटेड ‘बेस्ट म्यानेज्ड जनरल इन्स्योरेन्स कम्पनी २०२६’ अवार्डबाट सम्मानित भएको छ।
न्यू बिजनेश एज लिमिटेडले काठमाडौंमा आयोजना गरेको १०औँ संस्करणको ‘न्यूबिज कन्क्लेभ एन्ड बिजनेश एक्सिलेन्स अवार्ड्स २०२६’ समारोहमा कम्पनीलाई उक्त सम्मान प्रदान गरिएको हो।
आयोजकका अनुसार प्रभावकारी व्यवस्थापन, संस्थागत सुशासन, वित्तीय स्थायित्व, ग्राहक–केन्द्रित सेवा तथा व्यवसायिक उत्कृष्टताका आधारमा नेपाल इन्स्योरेन्स कम्पनीलाई अवार्ड प्रदान गरिएको हो।
कम्पनीले पछिल्लो समय दाबी भुक्तानी प्रक्रियामा सुधार, डिजिटल प्रविधिको प्रयोग, सेवा विस्तार तथा ग्राहक विश्वासलाई प्राथमिकतामा राख्दै व्यवसाय विस्तार गर्दै आएको जनाएको छ। निर्जीवन बीमा क्षेत्रमा लामो अनुभव र विश्वसनीय सेवाका कारण कम्पनीले बजारमा बलियो पहिचान बनाएको दाबी पनि गरेको छ।
नेपाल इन्स्योरेन्स कम्पनीका अनुसार उक्त सम्मानले कम्पनीको पारदर्शी व्यवस्थापन प्रणाली, जोखिम व्यवस्थापन क्षमता तथा दीर्घकालीन व्यवसायिक दृष्टिकोणलाई थप पुष्टि गरेको छ। कम्पनीले आगामी दिनमा अझ गुणस्तरीय सेवा प्रवाह गर्दै बीमा क्षेत्रमा नवीन योजना र आधुनिक सेवा विस्तारमा केन्द्रित रहने जनाएको छ।
कार्यक्रममा लाइफटाइम एचिभमेन्ट अवार्डसहित विभिन्न १० विधामा सम्मान प्रदान गरिएको थियो। कार्यक्रममा बैंकिङ, बीमा, उद्योग, व्यापार तथा कर्पोरेट क्षेत्रका प्रतिनिधिहरूको उल्लेखनीय सहभागिता रहेको थियो।
न्यू बिजनेश एज लिमिटेडले सन् २०१३ देखि निरन्तर ‘न्यूबिज कन्क्लेभ एन्ड बिजनेश एक्सिलेन्स अवार्ड’ आयोजना गर्दै आएको छ।
