कामना सेवा विकास बैंकद्वारा बुटवलमा विभिन्न सामाग्री हस्तान्तरण

काठमाडौं। कामना सेवा विकास बैंकले आफ्नो बुटवल क्षेत्रअन्तर्गत विभिन्न सामाजिक उत्तरदायित्व कार्यक्रम सम्पन्न गरेको छ। बैंकले आफ्नो शाखा कार्यालय भैरहवा र मणिग्राममार्फत समुदाय लक्षित सामाजिक कार्यक्रमहरू सञ्चालन गरेको हो।

यसअन्तर्गत भैरहवा शाखामार्फत लुम्बिनी अपाङ्ग दृष्टिविहीन अनाथ आश्रमलाई तीन थान बेड तथा मणिग्राम शाखामार्फत शान्ति नमुना माध्यमिक विद्यालयलाई जाडोयाम लक्षित न्यानो कपडा बुटवल क्षेत्र प्रमुख हेमन्त बाबु आचार्यले हस्तान्तरण गरे।

कार्यक्रमका अवसरमा बुटवल क्षेत्र प्रमुख आचार्यले सामाजिक उत्तरदायित्वअन्तर्गत अनाथ आश्रममा रहेका दृष्टिविहीन व्यक्तिका लागि बेड तथा आर्थिक रूपमा कमजोर र दृष्टिविहीन बालबालिका अध्ययनरत विद्यालयमा न्यानो कपडा वितरणमा बैंक सहभागी हुन पाएकोमा अत्यन्तै खुशी व्यक्त गरे।

सहयोग प्राप्त संस्थाहरूले बैंकद्वारा गरिएको यस पहलप्रति खुशी व्यक्त गर्दै आभार प्रकट गरेका छन्। कार्यक्रममा सम्बन्धित संस्थाका प्रतिनिधिहरू, बैंकका कर्मचारीहरू तथा अन्य सरोकारवालाहरूको उपस्थिति रहेको थियो। योसँगै बैंकले आगामी दिनसमेत सरोकारवालाको समन्वय तथा सहकार्यमा यस्ता प्रकृतिका कार्यक्रमहरुलाई निरन्तरता दिनेछ।