सुडानमा सुन खानी भत्किँदा ६ जनाको मृत्यु, दर्जनौँ बेपत्ता

काठमाडौं । सुडानको उत्तरी क्षेत्र स्थित एक सुन खानी भत्किँदा छ जनाको मृत्यु भएको छ । घटनामा २० जनासम्म फसेको आशंका गरिएको अधिकारीले शनिबार जानकारी दिएका छन् ।

बेर्बर स्थानीय निकायका कार्यकारी निर्देशक हसन इब्राहीम करारका अनुसार, यो दुर्घटना शुक्रबार रिवर नाइल राज्यको बेर्बर सहरको पश्चिमी उम आउद क्षेत्रको सुन खानीमा भएको हो ।

‘फसेका व्यक्तिहरूलाई उद्धार गर्न प्रयासहरू जारी राखिएको छ,’ करारले भने, ‘यद्यपि खानी भत्किनुको कारणबारे कुनै जानकारी छैन ।’

सुडानमा २०२३ को अप्रिलदेखि जारी सेना र अर्धसैनिक रापिड सपोर्ट फोर्सहरू बीचको युद्धका कारण, दुवै पक्षले आफ्नो संघर्षको लागि प्रमुख रूपमा देशको सुन उद्योगबाट आर्थिक स्रोत जुटाएका छन् ।

अधिकारी र गैरसरकारी संस्थाका अनुसार, सुडानको अधिकांश सुन व्यापार संयुक्त अरब इमिरेट्समार्फत निर्यात हुन्छ । जसले रापिड सपोर्ट फोर्सलाई हतियार आपूर्ति गरेको आरोप सामना गरेको छ । तर, इमिरेट्सले यो आरोप नकारेको छ ।

युद्धका बावजुद, सेना-समर्थित सरकारले सन् २०२४ मा ६४ टन सुन उत्पादनको रेकर्ड घोषणा गरेको थियो । तर, अधिकांश सुन कच्ची खानी र साना खानीबाट निकालिन्छ ।

जहाँ सुरक्षा उपायको अभाव र खतरनाक रसायनिक पदार्थको प्रयोगले खानीकर्मी र आसपासका समुदायको स्वास्थ्यमा गम्भीर जोखिम पुर्याउँछ ।

सुडानको युद्धले २५ लाखभन्दा बढी मानिसलाई भोकमरीको उच्च जोखिममा पुर्याएको छ । विशेषज्ञहरूको अनुसार, युद्धका दुवै पक्षले उत्पादन गरेको अधिकांश सुन चाड, दक्षिण सुडान र इजिप्ट हुँदै संयुक्त अरब इमिरेट्स पुग्छ ।

यस युद्धले हजारौं मानिसको जीवन लिइसकेको छ । लगभग १० लाख मानिसलाई विस्थापित गरेको छ । यसका अतिरिक्त, चार लाखभन्दा बढी सुडानीले शरणको लागि सीमा पार गरेका छन् ।