टिआरसी कार्यदलले मंगलबार प्रतिवेदन बुझाउने तयारी

काठमाडौं
बेपत्ता पारिएका व्यक्तिको छानबिन, सत्य निरूपण तथा मेलमिलाप आयोग ऐन, २०७१ लाई संशोधन गर्न बनेको (टिआरसी) विधेयक सम्बन्धी कार्यादलले आगामी मंगलबार प्रतिवेदन बुझाउने तयारी गरेको छ । गृहमन्त्री एवं कार्यदलका सदस्य रमेश लेखकले कार्यदलको प्रतिवेदन तयार भए पनि नेतहरुको समय नमिलेकाले मंगलबार प्रतिवेदन बुझाउने हुन सक्ने जानकारी दिए । कार्यदलले यसअघि नै सहमती गरी सकेकाले प्रधानमन्त्री सहित शीर्ष नेतालाई मात्रै बुझाउन वाँकी छ ।

‘हामीले आफ्नो तर्फबाट सबैपक्षसंग छलफल गरी सकेका छौं । प्रतिवेदनमा समेट्नुपर्ने सबै विषय समेटेर भाषागत रुपमा सबै हेरिसकिएको छ । नेताहरुको समय नमिलेकाले ढिला भएको छ । नेताहरुको मंगलबार समय लाउने भन्ने छ ’ उनले भने । मंगलबार समय मिलेमा प्रधानमन्त्री सहित नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष प्रचण्ड समय मिलाए प्रतिवेदन बुझाउने लेखकले बताए । कार्यदल प्रचण्ड नेतृत्वको सरकारले गत असार १३ गते कार्यदल गठन गरेको थियो । जसको सदस्यमा कांग्रेसबाट लेखक, नेकपा एमालेबाट प्रमुख सचेतक महेश बर्तौला र नेकपा माओवादी केन्द्रबाट उपमहासचिव जनार्दन शर्मा रहेका छन् ।
टिआरसी विधेयकमा शीर्ष नेतृत्वमा समझदारी भएमा संसदीय समितिबाट पारित भई संसदमा पेस हुने छ । संसदबाट विधेयक पारित भएमा १७ वर्षदेखि थाति रहेका द्धन्द्धकालीन मुद्धा समाधान हुने बाटो खोल्ने देखिएको छ ।