कोरला नाकाबाट नेपाल भित्रिँदै लिपमोटर B10, छिट्टै डेलिभरी हुने

काठमाडौं । नेपालका लागि लिपमोटरको एकमात्र आधिकारिक वितरक सांग्रिला मोटर्सले लिपमोटर B10 को आपूर्ति तथा ढुवानी प्रणालीमा परिमार्जन गरेको छ । सामान्यतया चीनबाट रसुवागढी नाका हुँदै गाडीहरू आयात गरिने भए तापनि, हालै रसुवा क्षेत्रमा आएको बाढीका कारण उक्त मार्गमा अस्थायी अवरोध सिर्जना भएको छ ।

सम्भावित ढिलाइलाई रोक्दै ग्राहकहरूलाई तोकिएकै समयमा गाडी उपलब्ध गराउन सांग्रिला मोटर्सले लिपमोटर B10 गाडीहरू मुस्ताङस्थित कोरला नाकाबाट नेपाल भित्र्याउन सुरु गरेको छ । यससँगै ग्राहकहरूलाई गाडी डेलिभरी गर्ने कार्य छिट्टै सुरु हुनेछ ।

नाइमा मोबिलिटी एक्स्पो र नाडा अटो शोमा लिपमोटर B10 ले पाएको उत्साहजनक प्रतिक्रिया तथा अत्यधिक बुकिङलाई ध्यानमा राख्दै यो निर्णय लिइएको हो । ग्राहकहरूको यही उच्च मागलाई छिटोभन्दा छिटो पूरा गर्न सांग्रिला मोटर्सले कोरला नाकाबाट हुने ढुवानी तथा भन्सार जाँचपासको प्रक्रियालाई तीव्र बनाएको छ, जसले गर्दा देशभरका खरीदकर्ताहरूले सहज र द्रुत रूपमा गाडी प्राप्त गर्न सक्नेछन् ।

बजेट भाषणपछि लिपमोटर B10 को मूल्य घटेसँगै यो ईभी पारखीहरूमाझ थप लोकप्रिय बनेको छ । ५४.९९ लाख रुपैयाँ मूल्य तोकिएको B10 मा १६० किलोवाटको शक्तिशाली रियर ह्विल ड्राइभ मोटर र ६७.१ किलोवाट आवर क्षमताको ब्याट्री रहेको छ, जसले एकपटकको पूर्ण चार्जमा ६०० किलोमिटरसम्मको उत्कृष्ट रेन्ज प्रदान गर्दछ । आरामदायी र व्यावहारिक प्रयोगका लागि निर्मित यस गाडीमा १८० एमएमको ग्राउन्ड क्लियरेन्स रहेको छ । साथै, १४.६ इन्चको २.५ केएचडी टचस्क्रिन, एन्ड्रोइड अटो र एप्पल कारप्लेसँग कनेक्टिभिटी, रेकर्डिङ सुविधासहितको ३६०–डिग्री क्यामेरा, हिटर र भेन्टिलेसन सुविधासहितको प्रिमियम लेदरेट सिट, र यस सेग्मेन्टमै सनरुफसहितको सबैभन्दा ठूलो प्यानोरामिक सनरुफ जस्ता अत्याधुनिक सुविधाहरू उपलब्ध छन् ।