राइडरको शोषण बन्द गर भन्दै इन्ड्राइभको कार्यालय अगाडि चालकहरूको प्रदर्शन

काठमाडौँ । राइड सेयरिङ कम्पनी इन्ड्राइभसँग सम्बन्धित चालकहरूले इन्ड्राइभको कार्यालयअगाडि प्रदर्शन गरेका छन्।

बुधबार इन्ड्राइभको कुपण्डोलस्थित कार्यालयअगाडि कमिसन घटाउन र उचित भाडा दर तोक्न माग गर्दै चालकहरूले प्रदर्शन गरेका हुन्। स्वतन्त्र चालक फाउण्डेसन नेपालको अगुवाइमा कमिसन बढी भएको, भाडा दर कम भएको गुनासोसहित उनीहरुले प्रदर्शन गरेका थिए।

‘भाडा कम, कमिसन बढी अब सहदैनौँ’, ‘श्रमको मूल्य देऊ, राइडरको जीवन सुरक्षित गर्’, ‘कमिसन घटाऔँ, न्याय बढाऔँ’, ‘हामी चुप लागेर बस्दैनौँ, अन्याय सहेर बस्दैनौँ’, ‘राइडरको शोषण बन्द गर’ लगायत नारा लेखिएका प्लेकार्ड बोकेर उनीहरु प्रदर्शनमा सहभागी भएका थिए।

सरकारले नयाँ आर्थिक वर्षदेखि लगाएको पाँच प्रतिशत भ्याट पनि चालकले पुरानै भाडा दरअनुसार कमिसनको रुपमा तिर्नुपरेको फाउण्डेसनकी अध्यक्ष रेश्मा बिसुन्केले बताइन्।