‘फिफाले मेसीलाई विश्वकप दिलाउन खोजेको’ पोस्टमा रोनाल्डोले लाइक गरेपछि हंगामा

काठमाडौं । पोर्चगिज फुटबल स्टार क्रिस्टियानो रोनाल्डोले फिफामाथि गम्भीर आरोप लगाइएको एउटा इन्स्टाग्राम पोस्टमा ‘लाइक’ ठोकेपछि हंगामा मच्चिएको छ । उनका प्रतिस्पर्धी फुटबलर लियोनल मेसीका फ्यानहरु आक्रोशित बनेका छन् ।

उक्त इन्स्टाग्राम पोस्टमा फिफामा व्यापक भ्रष्टाचार भएको र अधिकारीहरूले २०२६ को विश्वकप लियोनल मेसीलाई सुम्पने प्रयास गरेको आरोप लगाइएको थियो । अर्जेन्टिना स्पेनसँग फाइनलमा पराजित हुनुभन्दा ठीक अगाडि यो घटना सार्वजनिक भएको हो । यो प्रतियोगिताभरि नै रेफ्रीका निर्णयहरूलाई लिएर निकै विवाद उत्पन्न भएको थियो ।

रोनाल्डोको भेरिफाइड इन्स्टाग्राम अकाउन्टले एउटा भिडियो पोस्ट लाइक गरेको देखिएको छ, जसमा अर्जेन्टिनालाई २०२६ को विश्वकप फाइनलमा पुर्‍याउन फिफाले भ्रष्टाचार गरेको आरोप लगाइएको थियो । लियोनल स्कालोनीको टोली स्पेनसँग अतिरिक्त समयमा १-० ले पराजित भएलगत्तै यस ‘लाइक’ ले मानिसहरूको ध्यान तान्यो ।

उक्त पोस्टमा स्पेनी पत्रकार पिलार रोड्रिग्वेज लोसान्टोसले उत्तर अमेरिकामा भएको यस प्रतियोगिताभरि अर्जेन्टिनालाई पक्षपातपूर्ण रूपमा फाइदा पुर्‍याइएको भन्दै कडा आलोचना गरेकी थिइन् ।

फाइनलअघि अपलोड गरिएको उक्त भिडियोमा लोसान्टोसले रेफ्रीका निर्णयहरूको तीव्र आलोचना गरेकी थिइन् ।

‘एस्पेजो पब्लिक’ कार्यक्रममा बोल्दै लोसान्टोसले भनिन्, ‘अर्जेन्टिना त कम्तीमा पाँच खेलअघि नै प्रतियोगिताबाट बाहिरिनुपर्थ्यो ! उनीहरू फिफाको सहयोगले मात्र अहिलेसम्म टिकेका हुन्, जुन यस पृथ्वीकै सबैभन्दा भ्रष्ट संस्थाहरूमध्ये एक हो !’

उनले थप भनिन्, ‘त्यसैले म अर्जेन्टिनासँग अलिकति पनि डराउँदिन । मलाई जियानी इन्फान्टिनोसँग बढी डर लाग्छ । मेरो विचारमा हामी अर्जेन्टिनाविरुद्ध होइन, बरु पूरै फिफाविरुद्ध खेल्दैछौँ, जो लियोनल मेसीलाई विश्वकप सुम्पिन चाहन्छन् !’

राउन्ड अफ १६ मा इजिप्टमाथि अर्जेन्टिनाको रोमाञ्चक ३-२ को जितपछि रेफ्रीको पक्षपातपूर्ण व्यवहारको आरोप चरम सीमामा पुगेको थियो । उक्त खेलमा इजिप्टका मोस्ताफा जिकोको गोललाई भिएआरले बदर गरिदिएको थियो भने इजिप्टको पेनाल्टी अपिललाई पनि अस्वीकार गरिएको थियो ।

यस विवादको प्रतिक्रिया दिँदै इजिप्टियन फुटबल संघले फिफामा औपचारिक उजुरी दर्ता गरेको हफपोस्टले रिपोर्ट गरेको छ । उनीहरूले भनेका छन्, ‘इजिप्टको राष्ट्रिय टोलीको अधिकार र हितको रक्षा गर्नु बेवास्ता गर्न सकिने वा सामान्य मानिने विषय होइन। यो हाम्रो पूर्ण दृढता र जिम्मेवारी हो।’

यद्यपि, फिफाका रेफ्री प्रमुख पियरलुइजी कोलिनाले पक्षपातको आरोपलाई अस्वीकार गरे भने अर्जेन्टिनाका डिफेन्डर लिसान्ड्रो मार्टिनेजले रेफ्रीहरूको प्रदर्शन उत्कृष्ट रहेको दाबी गरे।