१० वटा सुरुङमार्ग बनाउन ६३ करोड बजेट

काठमाडौं । सरकारले विभिन्न १० स्थानमा सुरुङमार्ग निर्माण गर्न ६३ करोड बढी बजेट विनियोजन गरेको छ।

सुरुङमार्ग निर्माणका लागि पूर्वाधार विकास मन्त्रालयलाई अर्थ मन्त्रालयले ६३ करोड २१ लाख ३० हजार रुपैयाँ बजेट उपलब्ध गराएको हो।

टोखा छहरे गुर्जे भन्ज्याङ सुरुङमार्गका लागि ११ लाख ४८ हजार रुपैयाँ, सुर्खेतको भेरी नदीदेखि बर्दियाको दानुवा तालसम्म सुरुङमार्ग अध्ययन गर्न ५ लाख ६० हजार, दोलालघाट चर्नावती सुरुङमार्गका लागि १८ लाख ९० हजार रुपैयाँ र हात्तीसार बबई सुरुङमार्गका लागि ७ लाख ५६ हजार रुपैयाँ विनियोजन गरिएको छ।

यस्तै खुर्कोट चियाबारी सुरुङमार्ग, शिवपुर भालुबाङ सुरुङमार्ग र रानीघाट भुरीगाउँ सुरुङमार्गका लागि समान ३ लाख ९२ हजार रुपैयाँ छुट्याइएको पूर्वाधार विकास मन्त्रालयले जानकारी दिएको छ।

यस्तै सिद्धबाबा सुरुङमार्ग निर्माण गर्न ५० करोड रुपैयाँ र ग्वार्को सातदोबाटो एकान्तकुना फ्लाइओभर निर्माण गर्न दुई शीर्षकमा क्रमशः २ लाख रुपैयाँ र १२ करोड ४६ लाख रुपैयाँ विनियोजन गरिएको छ।

सुरुङमार्ग विकास कार्यक्रमका लागि ३ करोड ७७ लाख ८० हजार रुपैयाँ र विभिन्न प्रस्तावित सुरुङमार्गहरुको सम्भाव्यता अध्ययन गर्न १ लाख ९० हजार रुपैयाँ विनियोजन गरिएको छ।