नेपालले भारतीय भूमि मिचेको प्रमाण प्रधानमन्त्रीले दिनुपर्छः हर्कराज राई

काठमाडौं । श्रमसंस्कृति पार्टीका अध्यक्ष हर्कराज राईले गत जेठ १७ गते प्रधानमन्त्री वालेन्द्र शाहले नेपालले पनि भारतीय भूमि मिचेको भनेर बोलेको कुराको प्रमाण दिनुपर्ने बताएका छन्।

सोमबार बसेको प्रतिनिधिसभाको बैठकलाई सम्बोधनका क्रममा उनले यस्तो बताएका हुन् । उनले प्रधानमन्त्री शाहले नेपालले भारतीय भूमि मिचेको प्रमाण दिनुपर्ने यदि नसक्ने भए उक्त भनाइ सच्याउनुपर्ने पनि बताए।

‘कुनै पनि भूगोलबिनाको देश हुँदैन । हाम्रो भूगोलमा बेला बेला भइरहेका अतिक्रमणविरुद्ध संरक्षण र रक्षाको नीति लिनुको साटो प्रधानमन्त्रीले देशविरुद्ध बोलेका छन्’, उनले भने, ‘प्रधानमन्त्रीले कि नेपालले भारतीय भूमि मिचेको देखाऊन् कि संसद्‍मा उभिएर आफ्नो बचन सच्याऊन् ।’

उनले नेपाली सेनालाई अन्य काममा होइन सीमामा पठाउन पनि माग गरेका छन् । ‘नेपाली सेनालाई सीमामा लगेर राखौँ, सीमा सुरक्षाका लागि पठाऔँ’, उनले भने, ‘सेनालाई त सीमामा राख्ने हो तर अहिले अन्यत्र राखिएको छ।’उनले राष्ट्रिय स्वतन्त्र पार्टीका सभापति र परराष्ट्रमन्त्रीलले जवाफ दिएर नहुने बताए ।