होर्मुजमा जहाजमा आक्रमण : गम्भीर छलफलमा इरान र दक्षिण कोरिया

सोल । इरान र दक्षिण कोरियाबिच स्टेट अफ होर्मुजमा दक्षिण कोरियाली कम्पनीद्वारा सञ्चालन गरिएको जहाजमाथि भएको आक्रमणबारे गम्भीर छलफल जारी रहेको बताइएको छ ।

दक्षिण कोरियाको सरकारी समाचार एजेन्सी योन्ह्याप न्युज एजेन्सीका अनुसार, दक्षिण कोरियाको विदेश मन्त्रालयका प्रवक्ता पार्क इलले मे ४ मा भएको एचएमएम नामु माथिको आक्रमणबारे अनुसन्धान पूरा भएपछि आवश्यक कदम चालिने बताएका छन् ।

प्रारम्भिक अनुसन्धानले दुई अज्ञात उड्दै आएका वस्तुले एचएमएम नामु जहाजमा प्रहार हुँदा विस्फोट र आगलागी भएको निष्कर्ष निकालेको समाचारमा भनिएको छ । घटनास्थलबाट सङ्कलित अवशेषहरूको विश्लेषण जारी रहेको र आक्रमणमा प्रयोग भएका वस्तु तथा जिम्मेवार पक्षको पहिचान गर्ने प्रयास भइरहेको जनाइएको छ ।

‘यदि थप तथ्य फेला परेमा, हामी इरानी पक्षसँग आवश्यक संवाद जारी राख्नेछौँ र उपयुक्त कदम चाल्नेछौँ, प्रवक्ता पार्क इलले भने । उनले क्षेत्रभित्र जहाज र चालक दलको सुरक्षा तथा निर्बाध आवागमन सुनिश्चित गर्नु दक्षिण कोरियाको प्रमुख प्राथमिकता रहेको पनि बताए ।

यस घटनामा एक चालक दलका सदस्य सामान्य घाइते भएका थिए । दक्षिण कोरियाली अधिकारीहरूले आक्रमणका लागि इरानलाई जिम्मेवार ठहर गरेका छन् भने इरानले उक्त आरोप अस्वीकार गरेको छ ।