0
Shares
काठमाडौं । बाढी पूर्वानुमान महाशाखाले भोटेकोशी नदीमा फेरि बाढी आएको जानकारी दिँदै स्याप्रुबेँसीसम्म आइपुगेको जनाएको छ । शुक्रबार दिउँसो १२ः३० बजे सूचना जारी गर्दै महाशाखाले बाढीको जानकारी दिएको हो ।
‘भोटेकोशी नदी रसुवामा बाढी बढिरहेको र बाढी स्याप्रुबेसीसम्म आइपुगेको हुँदा त्रिशूली नदीको तटिय क्षेत्र (मुग्लिनसम्म) अर्को सूचना नआउँदासम्म उच्च सतर्कता सहित सुरक्षित स्थानमा रहन अनुरोध छ,’ महाशाखाले भनेको छ ।
यसबीच राष्ट्रिय विपद जोखिम न्यूनीकरण तथा व्यवस्थापन प्राधिकरणले पनि रसुवाको भोटेकोशी नदी क्षेत्रमा पुनः लेदोसहितको बाढीको जोखिम बढेको भन्दै उच्च सतर्कता अपनाउन अपिल गरेको छ ।
प्राधिकरणले शुक्रबार विज्ञप्ति जारी गर्दै भदौ १० गते आएको भीषण बाढी आएकै क्षेत्रमा पुनः लेदोसहितको पानीको बहाव बढेको जानकारी दिएको हो । माथिल्लो क्षेत्रमा लेदो बढेकाले पुनः थप बाढी आउन सक्ने जोखिम कायमै रहेको प्राधिकरणले स्पष्ट पारेको छ ।
