टिआरसी विधेयक संसद्बाट पारित गर्ने तयारी,शीर्ष नेताले सम्बोधन गर्ने

काठमाडौँ
बेपत्ता पारिएका व्यक्तिको छानबिन, सत्य निरूपण तथा मेलमिलाप आयोग ऐन, २०७१ लाई संशोधन गर्न बनेको (टिआरसी) विधेयक सांसदबाट पारित गर्ने भएपछि शीर्ष नेतृत्वहरुले संसदमा सम्बोधन गर्नुहुने भएको छ ।
आज दिउँसो १ बजे बस्ने प्रतिनिधि सभा बैठक टिआरसी विधेयक माथिको छलफलमा प्रधानमन्त्री केपी शर्मा ओली, नेपाली काँग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल प्रचण्डले सम्बोधन गर्ने तयारी गरिएको हो ।
प्रतिनिधि सभा बैठकमा कानुन, न्याय तथा मानवअधिकार समितिको प्रतिवेदन सहितको टिआरसी विधेयक, २०७९ छलफलका लागि प्रस्तुत गर्ने र पारित गर्ने सम्भावित कार्यसूची छ । सबै नेताहरूले सम्बोधन गरिसकेपछि आज नै उक्त विधेयक पारित गर्ने तयारी छ । समितिको प्रतिवेदनसहितको विधेयक मङ्गलवार नै संसदमा पेस भएको थियो ।
यसअघि दलहरूबिचको विवादका कारण रोकिएको विधेयक राजनीतिक सहमति भएसँगै पारित हुने चरणमा पुगेको हो । तत्कालीन प्रधानमन्त्री प्रचण्ड नेतृत्वको सरकारले गत असार १३ गते विधेयकमा सहमति गर्न काँग्रेस, एमाले र माओवादी सम्मिलित तीन सदस्यीय कार्यदल गठन गरिएको थियो । उक्त कार्यदलको सहमति अनुसार तयार भएको प्रतिवेदनसहित विधेयक संसदमा पेस भएको थियो ।