११ दिनपछि एक महिलाको सकुशल उद्धार

काठमाडौं । भोटेकोशी हुँदै त्रिशुली नदीमा गएको बाढीमा फसेकी विदुर नगरपालिका १० स्थित वेत्रावतीबाट आज अपराह्न चन्द्रिका श्रेष्ठको सकुशल उद्धार गरिएको छ ।

सशस्त्र प्रहरी बल १९ नं गुल्मबाट बाढी प्रभावित क्षेत्रमा सशस्त्र प्रहरी निरीक्षक सुमन विकको नेतृत्वमा रहेको टोलीले ६४ वर्षीया श्रेष्ठलाई उनको घरको चौथो तलाबाट उद्धार गरेको हो ।

गुल्मका प्रमुख, सशस्त्र प्रहरी नायव उपरीक्षक वीरेन्द्र राउतका अनुसार बाढीबाट प्रभावित वस्तीका घरमा रहेका सामग्री हटाई सहयोग गर्न पुगेको उद्धार टोलीले घरबाट महिलाको आवाज सुनेपछि त्यसलगत्तै उनको उद्धार गरिएको हो । उनी हिलोमा गाडिएको अवस्थामा भेटिएकी थिइन्। थप उपचारको लागि श्रेष्ठलाई काठमाडौं लगिएको छ । रासस