होर्मुज जलमार्गमा सेवा शुल्क उठाउने कानुनको मस्यौदा इरानी संसदीय समितिबाट पारित

काठमाडौं। इरानी संसदको राष्ट्रिय सुरक्षा तथा विदेश नीति आयोग ले होर्मुज जलमार्ग सुरक्षा र व्यवस्थापनसम्बन्धी प्रस्तावित कानुनको धारा ३ अनुमोदन गरेको छ। उक्त प्रावधानअनुसार होर्मुज जलडमरूमध्य पार गर्न इरानबाट अनुमति पाएका देशका जहाजले इरानले उपलब्ध गराउने विभिन्न सेवाबापत शुल्क तिर्नुपर्नेछ।

इरानको सरकारी समाचार संस्था इर्नाका अनुसार आयोगका प्रवक्ताले धारा ३ अन्तर्गत समुद्री सेवा, वातावरणीय सेवा, विशेष परिस्थितिमा इन्धन आपूर्ति, बीमा, सुरक्षा तथा अन्य उपलब्ध सेवाका लागि शुल्क लिइने बताएका छन्।

आयोगका प्रवक्ता हसन कश्कावी ले होर्मुज जलडमरूमध्यबाट आवतजावत गर्न अनुमति प्राप्त देशका जहाजबाट सेवा शुल्क असुल गरिने जानकारी दिएका छन्। उनका अनुसार शुल्क इरानी रियाल वा तेहरानले तोकेको अन्य मुद्रामा भुक्तानी गर्नुपर्नेछ।

उनले पर्शियन गल्फ र होर्मुज जलमार्गमा आफ्नै नियम तथा विशेष अवस्था रहेको उल्लेख गर्दै सन् १९८२ को समुद्री कानुनसम्बन्धी संयुक्त राष्ट्रसंघीय महासन्धि सन्दर्भमा पनि धारणा राखे।

कश्कावीका अनुसार उक्त महासन्धि स्वीकार गरेपछि ओमानले आफ्नो राष्ट्रिय सार्वभौमसत्ता र राष्ट्रिय सुरक्षामा महासन्धिका प्रावधानले असर पार्न नहुने भन्दै राजनीतिक घोषणा जारी गरेको थियो।

प्रस्तावित कानुनमा होर्मुज जलडमरूमध्यसँग सीमा जोडिएका राष्ट्रहरूको अधिकारलाई समेत ध्यानमा राखिएको इरानी संसदीय समितिले जनाएको छ।

यो विधेयक हाल संसदीय समितिबाट अनुमोदन भएको मस्यौदा हो। यसलाई पूर्ण कानुनको रूपमा लागू गर्न इरानको संसदीय तथा कानुनी प्रक्रियाका थप चरण पार गर्नुपर्ने हुन्छ।