इरानद्वारा आजदेखि स्ट्रेट अफ हर्मुज पूर्णरूपमा बन्द गरेको घोषणा

तेहरान । इरानले आजदेखि स्ट्रेट अफ हर्मुज पूर्णरूपमा बन्द गरेको घोषणा गरेको छ । साथै तेहरानले कुनै पनि जहाजले यो जलमार्ग पार गर्न खोजेमा लक्षित गरिने चेतावनी पनि दिएको छ । इरानले यसलाई बन्द गरेपछि तेल आपूर्ति ठप्प हुने र मूल्य आकासिने अनुमान गरिएको छ । पूर्ण बन्दले यसलाई १५०–२०० अमेरिकी डलर प्रतिब्यारेलसम्म पु¥याउन सक्ने विश्लेषकहरूले अनुमान गरेका छन् । यसले विश्वव्यापी मुद्रास्फीति बढाउने र आर्थिक मन्दी निम्त्याउने जोखिम छ ।

इरानको इस्लामिक रिभोल्युसनरी गार्ड कोप्र्स (आईआरजीसी) र संयुक्त सैन्य कमान्डले जारी गरेको वक्तव्यमा यस्तो चेतावनी दिइएको हो । वक्तव्यमा अमेरिकाले इरानी बन्दरगाहहरूमा नाकाबन्दी जारी राखेकाले र हालैका हमलाका कारण स्ट्रेट अफ हर्मुजलाई पूर्ण नियन्त्रणमा लिइएको जनाइएको छ ।

फारसको खाडीबाट विश्व बजारमा तेल र ग्यास निर्यात गर्ने मुख्य मार्ग मानिएको यो साँघुरो जलमार्गबाट विश्वको करिब २० प्रतिशत कच्चा तेल र ठूलो मात्रामा तरल प्राकृतिक ग्यास निर्यात हुन्छ । साउदी अरब, इराक, कुवेत, यूएई र कतार जस्ता प्रमुख तेल उत्पादक देशहरूको निर्यात यसै मार्गमा निर्भर छ ।

इरानको यो कदमबाट भारत, चीन, जापान, दक्षिण कोरिया जस्ता देशहरू सबैभन्दा बढी प्रभावित हुनेछन् ।

यसको बाछिटा नेपालमा पनि अवश्य आइपुग्छ । नेपालले भारतबाट पेट्रोलियम पदार्थ आयात गर्छ । अन्तर्राष्ट्रिय मूल्य वृद्धिले नेपालमा पनि पेट्रोल, डिजेल र ग्यासको मूल्य बढ्ने सम्भावना छ ।