ललितपुरको नापी र यातायात कार्यालयबाट ३२ बिचौलिया पक्राउ

काठमाडौं । सरकारी कार्यालयमा सेवाग्राहीलाई सास्ती दिने र ‘काम मिलाइदिन्छु’ भन्दै रकम असुल्ने बिचौलियाविरुद्ध ललितपुर प्रहरीले आक्रामक ‘सर्च अपरेसन’ चलाएको छ। जिल्ला प्रहरी परिसर ललितपुरको टोलीले मंगलबार नापी र यातायात कार्यालयबाट ३२ जना बिचौलियालाई नियन्त्रणमा लिएको हो।

प्रहरी उपरीक्षक (एसपी) गौतम मिश्रका अनुसार ललितपुर नापी कार्यालयबाट २१ जना र एकान्तकुनास्थित यातायात कार्यालयबाट ११ जनालाई पक्राउ गरिएको छ। पक्राउ परेकाहरूले सेवाग्राहीलाई अनावश्यक हैरानी दिने, लाइन मिचिदिने प्रलोभन देखाउने र अनधिकृत रूपमा रकम बार्गेनिङ गर्ने गरेको पाइएको छ।

एकान्तकुनास्थित यातायात कार्यालयमा बिचौलियाहरूको बिगबिगी रहेको जनगुनासोपछि प्रहरीले निगरानी बढाएको थियो। पक्राउ परेकामध्ये कतिपयले त कार्यालयभित्रका आधिकारिक कागजात र प्रक्रियासम्मै अनधिकृत पहुँच पुर्‍याएर सेवाग्राहीबाट मोटो रकम असुल्ने गरेको प्रारम्भिक अनुसन्धानमा खुलेको छ।