बाढी पहिरोमा परी २१७ जनाको मृत्यु, २८ जना बेपत्ता

काठमाडौँ । केही दिनअघिको अविरल वर्षाले बाढी पहिरो र डुबानका कारण हालसम्म २१७ जनाको मृत्यु भएको छ । २८ जना बेपत्ता छन् ।

विपद्मा १४३ जना घाइते भएको गृह मन्त्रालयका प्रवक्ता ऋषिराम तिवारीले जानकारी दिए । बाढी, पहिरोपछिको खोज, उद्धार र राहतका लागि सबै सुरक्षा निकाय परिचालित भइरहेको उनको दाबी छ ।

बाढी प्रभावितलाई खाद्यान्नलगायत आपत्कालीन राहत सामग्री उपलब्ध गराइएको तथा घाइतेको निःशुल्क उपचार भइरहेको जानकारी दिइएको छ ।

सरकारले खोज, उद्धार र राहतलाई उच्च प्राथमिकता दिएको र यातायात सञ्चालन गर्न अवरुद्ध राजमार्ग खोल्न पहल भइरहेको प्रवक्ता तिवारीले बताए ।