एक किलो स्याउको मूल्य जम्मा ५० रुपैयाँ

काठमाडौं । कालीकोटमा किसानले बारीबाट ५० रुपैयाँ किलो स्याउ बिक्री गर्न बाध्य भएका छन् । साउनको तेस्रो सातादेखि किसानले स्याउ टिपेर बिक्री गर्न सुरु गरको हुन् ।

जिल्लामा सबैभन्दा बढी स्याउ उत्पादन हुने तिलागुफा नगरपालिका र रास्कोट नगरपालिकाका किसान स्याउ टिप्न व्यस्त हुन थालेका तिलागुफा १ का रजबहादुर बुढाले बताए ।

‘नगरपालिकाले साउन २० गतेदेखि स्याउ टिप्न किसानलाई आग्रह गरेको थियो,’ उनले भने, ‘अहिले बारीमा नै प्रतिकिलो ५० रुपैयाँमा बिक्री भइरहेको छ ।’

बढी मूल्य पाउने आशामा किसानले छिटो स्याउ टिप्दा स्वाद हराउने भएकाले नगरपालिकाले साउन २० गतेदेखि मात्र टिप्न आग्रह गरेको तिलागुफा ४ का पूर्वअध्यक्ष खड्कराज शाहीले बताए ।

स्याउ बजार लैजान समस्या रहेको भन्दै मूल्य कम पाउने गरेको रास्कोट नगरपालिका ८ फुकोटका पुष्पराज बरालले बताए ।

‘स्याउ उत्पादन प्रशस्त हुन्छ, यहाँको लेकाली क्षेत्रबाट स्याउ बजारसम्म पुर्याउन ढुवानी खर्च महँगो पर्छ,’ उनले भने, ‘ठेकेदारले बारीमा आएर स्याउ लैजाने गरेका मूल्य कम भए पनि ढुवानीको समस्या भने अहिले छैन ।’

किसानले उत्पादन गरेको स्याउ बिक्री र ढुवानीका लागि अनुदान दिने गरिएकोे जिल्ला कृषि विकास कार्यालयले जनाएको छ ।