पश्चिमी वायु प्रणालीको प्रभावले वर्षा हुँदै, भोलिको मौसम कस्तो ?

काठमाडौं । पश्चिमी न्यून चापीय प्रणालीको आंशिक प्रभावका साथै स्थानीय वायुको समिश्रणले देशका केही स्थानमा बदली र वर्षा भएको जल तथा मौसम पूर्वानुमान महाशाखाले जनाएको छ ।

महाशाखाका मौसमविद् सञ्जिव अधिकारीका अनुसार विशेषगरी कोशी, बागमती र गण्डकी प्रदेशमा आंशिकदेखि सामान्य बदली रहनुका साथै अहिले कोशी प्रदेशका पहाडी भागका एक दुई स्थानमा हल्का वर्षा भइरहेको छ । उनले बाँकी प्रदेशमा मौसम सामान्यतया सफा रहेको बताए ।

दुई दिनदेखि बिग्रिएको मौसम शनिबारदेखि सुधार हुँदै जाने छ । ‘आज राति कोशी, गण्डकी र कर्णाली प्रदेशका पहाडी भेगमा हल्का वर्षा र हिमाली क्षेत्रमा हल्का हिमपातको सम्भावना छ,’ मौसमविद् अधिकारीले भने, ‘शनिबारदेखि मौसम विस्तारै सुधार हुँदै जानेछ ।’

प्रि-मनसुनी गतिविधि सक्रिय भएको जनाउँदै उनले पश्चिमी न्यूनचापीय प्रणालीको समान्य प्रभावका साथै स्थानीय वायुको सामान्य प्रभावले बदली र केही स्थानमा वर्षा गराएको उल्लेख गरे । महाशाखाका अनुसार बिहीबार र आज काठमाडौंको आकाश सामान्यतया बदली रहेको छ ।