नेप्से परिसूचकमा दोहोरो अंकको गिरावट, कारोबार २ अर्ब ६७ करोडमा सीमित

काठमाडौं । लगातार छैठौं कारोबार दिन पनि नेपाल स्टक एक्सचेन्ज (नेप्से) परिसूचक घटेको छ । यसदिन नेप्से परिसूचक १६.५४ अंकले घटेर २ हजार ६ सय ३२.९६ को बिन्दुमा आएको छ । आज कारोबारमा आएका २९ कम्पनीको सेयर मूल्य बढेको छ भने २ सय ४० कम्पनीको घटेको छ ।

सोमबार नेप्से परिसूचकसँगै कारोबार रकम पनि घटेको छ । आज २ अर्ब ६७ करोड १८ लाख ३२ हजार रुपैयाँ बराबरको सेयर किनबेच भएको छ । शुक्रबार ३ अर्ब ९४ करोड ५८ लाख ४ हजार रुपैयाँको सेयर कारोबार भएको थियो ।

आज सबैभन्दा धेरै कमाउनेमा स्नो रिभर्स लिमिटेड, याम्बालिङ हाइड्रोपावर र टक्सार पिखुवा खोला हाइड्रोपावरका लगानीकर्ता रहेका छन् । यी तीनै कम्पनीको मूल्यमा सकारात्मक सर्किट लागेको छ । यता, सबैभन्दा धेरै गुमाउनेमा स्वाभिमान लघुवित्तका लगानीकर्ता रहेका छन् । यो कम्पनीको सेयर मूल्य ५.८३ प्रतिशतले घटेको छ ।