बाख्रा चराउन गएकी ११ वर्षीया बालिकालाई १० रुपैयाँको प्रलोभनमा पारी करणी गरेको आरोपमा ४६ वर्षीय पुरुष पक्राउ

काठमाडौं । पर्सा जिल्लाको ठोरी गाउँपालिका–२ सुन्दरबस्तीका ४६ वर्षीय अशोक साहलाई ११ वर्षीय बालिकामाथि जबरजस्ती करणी गरेको आरोपमा प्रहरीले पक्राउ गरेको छ ।

घटना यही साउन २१ गते बिहानको हो । प्रहरीका अनुसार, बालिका बाख्रा चराउँदै गर्दा साहले १० रुपैयाँको प्रलोभनमा पारी करणी गरेका हुन् ।

पीडित पक्षले दिएको जाहेरीका आधारमा त्यही दिन दिउँसो ३ बजे उनलाई प्रहरीले नियन्त्रणमा लिएको हो ।

पीडित बालिकाका अभिभावकले साह विरुद्ध ठोरी गाउँपालिका–२ तिनघरेस्थित जंगलमा जबरजस्ती करणी गरेको उजुरी जिल्ला प्रहरी कार्यालय पर्सामा दर्ता गरेका थिए ।

पक्राउ परेका साहलाई बिहीबार पर्सा जिल्ला अदालतबाट म्याद थप गराई तीन दिनका लागि हिरासतमा राखी थप अनुसन्धान भइरहेको प्रहरीले जनाएको छ ।