धादिङबेसी-मलेखु सडक ठप्प, दुई ठाउँमा पहिरो

धादिङ । जिल्ला सदरमुकाम धादिङबेसीलाई पृथ्वी राजमार्गसँग जोड्ने धादिङबेसी-मलेखु सडक पहिरोले अवरुद्ध बनेको छ ।

नीलकण्ठ नगरपालिका ८ दारेगौडा र साघुटारमा सडकमाथिबाट खसेको पहिरोले सडक पूर्ण रुपमा अवरुद्ध बनेको हो ।

अहिले त्यस क्षेत्रमा सवारी आवागमन बन्द भएको छ । केही वर्ष अघिदेखि पहिरो खस्दै आएको स्थानमा फेरि पहिरो आएको स्थानीयले बताएका छन् ।

पहिरोले ढुंगा र रुखहरु खसेकाले तत्काल बाटो खुलाउन कठिन रहेको जिल्ला प्रहरी कार्यालय धादिङका प्रहरी निरीक्षक प्रल्हाद सिलवालले जानकारी दिए ।